Musika saioekin hasi eta Gau Beltzarekin amaituko da Astigarragako urriko agenda

Eskaintzaz gainezka iritsi da Astigarragako urriko kultur agenda. Ekitaldi eta ikuskizun ugari izan dira hilabeteko lehenengo astean, eta halaxe izango da datozen egunetan ere. Mota guztietako emanaldiak, ikuskizunak eta jarduerak antolatu dituzte udalaren eta eragileen artean, eta adin ezberdinetako astigartarrek parte hartu ahal izango dute horietan. 

Musika izango da, esaterako, gaur arratsaldeko protagonista. I. Ahober abesbatza zikloko bigarren kontzertua eskainiko dute Voces Graves de Madrid eta Eragiyok abesbatzek. Astigarragako taldeak egingo du sarrera, eta Madrilgo abesbatzak Eva Ugalderen, Aita Madinaren, Junkal Guerreroren eta Josu Elberdinen lanak abestuko dituzte. Alabaina, gaurkoa ez da abesbatzekin lotutako jarduera bakarra izango. Urriaren 21ean Bartzelonako Coral Escrinyk abesbatzak Astigarragako Aiztondo abesbatzarekin batera eskainiko du kontzertua. Ikuskizuna guztiz doakoa izango da. 

Hiru jarduera nabarmentzen dira urriko agendan

Jardueren artean hiru nabarmentzen dira hilabete honetako kultur agendan. Lehenengoa urriaren 20 eta 21ean izango da, 'Genero ezberdintasunaren eragina ingurune birtualetan' gaiari buruzko jardunaldiekin. Bost hitzaldi eskainiko dituzte Erriberan, informatikaren eta generoaren arteko loturei buruz. Ondorengo emakumeak izango dira hizlariak: Marta Macho-Satdler, Nuria Varela, Carolina González, Laura Mañas eta María López. 

Bigarren ekitaldi esanguratsua ere urriaren 21ean izango da. Astigarragako Gazte Asanbladaren XXX. Urteurren ospakizuna egingo dute, egun osoko egitarauarekin. Horma irudiak margotzen hasiko dute eguna; ondoren, 'gazteen eta ez hain gazteen' arteko kirol probak egingo dituzte. Saio horiek amaituta, kalejiran joango dira Txomiñenera, eta bertan egingo dute Herri Bazkaria. Giroa berotzen denean, Karaoke eta Playback frogekin borobilduko dute eguna, eta Distopia Elektrotxaranga arduratuko da bazkalostea girotzeaz. 

Azkenik, hilabete amaieran iritsiko da azken jarduera potoloa. Gau Beltza ospatzen agurtuko dute urria astigartarrek, eta jarduera ugari antolatu dituzte ospakizuna egiteko. Urriaren 28an jaiari buruzko informazioa jasotzeko aukera izango dute herritarrek, eta urriaren 31 izango da egun nagusia. Makilatzeko tailerra, hilerrirako kalejira eta mokadutxoa antolatu dituzte, besteak beste. 

Literaturak, antzerkiak eta zinemak ere badute tartea

Ohiko jarduerek ere izango dute lekua urriko kultur eskaintzan. Literaturaren kasuan, Iban Zalduaren 'Ipuina engainua da' izango da hilabeteko protagonista. Hilaren 17an lan hori izango dute hizpide Isabel Etxeberriak zuzendutako Irakurketa Klubean. Urriaren 27an, berriz, Zalduak berak eta Miren Narbaizak irakurraldi musikatua eskainiko dute, Erribera kulturgunean. 

Antzerkiari dagokionez, Vaiven Teatro taldearen 'Sarekada' antzezlanaz gozatzeko aukera izango da. Datorren larunbatean eskainiko dute saioa Nere Gorritik, Inazio Tolosak, Ainhoa Aierbek eta Xanti Korkostegiak. 

Amaitzeko, bi zinema saio eskainiko dituzte urrian. Lehenengoa urriaren 22an izango da; haurrentzat 'Abentura erraldoia' pelikula proiektatuko dute, eta helduentzat 'El sol del futuro' filma.