Talde lan bikaina egin dute Iruki-Donostialdea Bizikletan taldeko kideek Iruñerriko Itzulian. Elkarlanean, emaitza onak lortu dituzte txirrindulariek, eta itzulia irabaztea lortu du Aimar Alarcia junior mailako txirrindulari donostiarrak. Lan onaren egileetako bat Tasio Senperena astigartarra izan da. Txukun aritu da Senperena, eta tarteko helmugen sailkapena irabazi du, itzulia amaitu eta 56. postua eskuratzeaz gain; liderrarengandik 12 minutu eta 32 segundura.
Erakusleiho ederra izan da lasterketa Senperenarentzat. Lehiakor dabil azkenaldian astigartarra, eta Iruñerriko Itzulian erakutsi zuen emaitza onak lortzeko eta lan egiteko gaitasuna duela.