«Ehun ta ehun, berrehun! Aupa Astiarra!». Horixe ohiukatu zuten Astigarragako Udaletxeko balkoitik Gazte Asanbladako kideek, eta orduan lehertu ziren suziriak Foru plazan. Txupinazo jendetsua izan zen Astigarragakoa, inork ez baitzuen hutsik egin nahi izan Santio Jaien hasiera ekitaldian. Horren aurretik, haurren txanda izan zen goizean; astigartar gaztetxoek goxoki eta urez bete zuten plaza, eta gustura etxeratu ziren.
Egitarauak jarraipena izango du datozen egunetan. Gaur, esaterako, Toka eta Bolo Txapelketak, Patata Tortila Lehiaketa edo Gazte Bazkaria izango dira goizean. Horrez gain, Jaietako lehenengo Pilota Txapelketako finala jokatuko dute Lizeaga anaiek, 12:00etan, Txomiñenen.
Eguerdian izanen da Aranoko txupinazoa
Santio Jaien esperoan pasa dute urtea Aranoko bizilagunek ere. Gaur eguerdian botako dute txupinazoa udaletxeko balkoitik, eta lau eguneko egitarauak koloreztatuko du herria. Txupinazoan haurrak izango dira protagonistak; goxotasuna eta izaera herrikoia goxoki zaparradarekin uztartuko baitira.
Txupinazoa lehertu eta segituan irtengo dira buruhaundiak Aranoko kaleetara, eta plazatik frontoi ondoko karpara igaroko da festa. Bertan eginen dute herriko artisauen eta produktuen azoka. Bertaratzen direnek etxean egindako sagardoa, txorizo egosia, gazta eta askotariko protuktuak eskuratu ahal izango dituzte.
