Heldu da askok irrikaz itxaron duten eguna; heldu da Astigarragako Kros Herrikoiaren bigarren edizioa. Arratsaldeko 17:00etan abiatuko da lasterketa Kale Nagusitik, esne makinaren paretik; eta korrikalariek eremu horretan bertan amaituko dute lasterketa, hori izango baita helmuga. Astigarragako Kros Herrikoian, 5,7 kilometroko ibilbidea osatu behar izaten dute korrikalariek. Abiatu eta berehala, Apeztegi plazatik kultur etxe zaharrera iritsiko dira, eta Anuskatik Zarkumendegirako bidegorria hartuta, futbol zelaiaren sarreran buelta eman eta herrigunera itzuliko dira. Ondoren, Galtzaur kaletik sartuko dira, Donostia Ibilbidera iristeko; eta errepidea gurutzatuta, bidegorritik joango dira Txingurriraino. Berriro errepidea gurutzatu, eta Ibailurretik eta hezegunetik iritsiko dira Pilotari kalera, helmugarako bidea hartzeko.
Entrenatu dutena erakustera irtengo dira asko gaurkoan, eta seguru dena emango dutela, batez ere astigartarrek, etxeko lasterketan.