Datozen egunotan, ortzadarraren kolorez jantziko da Astigarraga: udaletxeko fatxadan, kiroldegian, Gaztelekuan eta Erribera kulturgunean LGTBIQ+ bandera jarriko da. Etzi, LGTBIQ+ Harrotasunaren eguna aldarrikatzeko asmoz, Udalak, Emakumeon Etxeak, Gazte Asanbladak eta Gaztelekuak antolatuta hainbat ekintza burutuko dira.
Udalak bihar antolatu du Trans eta LGTBI+ legearen inguruko mahai-ingurua Gehitu, Euskal Herriko lesbiana, gay, bisexual, trans eta intersexualen elkartearekin batera. 18:00etan, Erriberako erakusketa-gelan izango da. Hizlariak honakoak izango dira: Brayan Altimasberes Alaminos (Loratuz Loratuko kidea, trans aktibista eta Hiruki Larroxako langilea), Josebe Iturrioz (aktibista transfeminista eta irakaslea) eta Asmi Molina (intersex aktibista eta Gehituko kidea); moderatzaile-lanetan Izei Etxeberria arituko da (aktibista trans asexuala eta Gehituko idazkaria).
Mahai-inguruaren helburua bikoitza da: batetik, jendartean eztabaida piztu duen trans legea ezagutzera ematea, legearen lorpenak, gabeziak eta erronkak azaltzea; bestetik, mahai-inguruko hizlariek eta moderatzaileak euren bizipenak kontatuz, genero-identitate eta orientazio-sexual anitzetara gerturatzea.
Gaztelekukoek LGTBIQ murala sortuko dute etzi eta ostiralean Zinegoak jaialdiko hainbat film labur eskainiko dira
Bestalde, etzi, ekainaren 28an, 10:30etan, Gaztelekutik abiatuta Kultur Etxe Zaharraren azpiandagoen paretan LGTBIQ+ murala sortuko dute.
Azkenik, Bilboko Zinegoak, LGTBIQ+, 20. nazioarteko zinema eta arte eszenikoen jaialdiko film laburren emanaldia eskainiko da ekainaren 30ean, 19:00etan, Erriberako terrazan, doan eta jatorrizko azpitituluekin. Honako film laburrak eskainiko dira: 1. Irrits (Euskadi), 2. Warsha (Libano-Frantzia), 3. Arnasa (Euskadi), 4. Dating internet strangers (Brasil), 5. Son (Espainia), 6. Ezohikoak (Euskadi), 7. It’s a gray, gray world (Iran).