Guztion dirulaguntzak eskatzeko epea zabaldu du Astigarragako Udalak, herrian saltoki bat ireki nahi dutenentzat. Merkataritza berraktibatzeko programaren baitan abiatu zuen dirulaguntza lerro hori Udalak, 2020an; eta helburua da merkataritza ekintzailetza sustatzea. Ordutik, zortzi proiektu diruz lagundu ditu, eta aurten ere izango dute aukera ekintzaileek, beren proiektua Astigarragako erdigunean abiatu eta dirulaguntza jasotzeko.
Honako gastuak lagunduko dituzte diruz, besteak beste: lokalaren alokairua, eraketa gastuak, lokalaren eraberritzea, ekipamendua eta makinaria, komunikazio gastuak, eta kotizazio, aseguru eta aholkularitza zerbitzua. Printzipioz, gastuen %30 estaliko luke dirulaguntzak, eta zenbateko hori haunditu ahal izango da 1.500 edo 2.000 euroan, eskatzailearen ezaugarrein arabera, eta konpromiso batzuk hartuz gero honako alorretako batean edo batzuetan: iraunkortasuna, euskera, emakumeen eta gizonen arteko aukera berdintasuna, asoziazionismoa, enplegu sorrera... Eskatzaile bakoitzak, gehienez ere, 4.000 euroko dirulaguntza jaso ahal izango du.
Urriaren 31ra arte izango da dirulaguntzak eskatzeko epea, edo kreditua agortu arte. Horretarako, Astigarragako Udalaren atarian (astigarraga.eus) daude eskuragarri eskaera orriak eta dirulaguntzen oinarriak, eta bertatik egin daiteke eskaera ere: astigarraga.eus/tramiteak. Zalantzak argitzeko, berriz, 943 50 57 00 telefonora deitu daiteke, edo tokikogarapena@astigarraga.eus helbidera idatzi.
Gainera, Astigarragako lokal hutsen poltsa publikoa ere ikusgai dago guztion.astigarraga.eus atarian. Bertan kontsultatu daitezke programara atxikita dauden hainbat lokalen ezaugarriak. Beren lokala iragartzeko interesa duten jabeek ere badaukate aukera, eta informazioa eskatu edo izena eman dezakete webgunean bertan.