Haurren heziketari eskainitako hitzaldi zikloa osatu du Astigarragako Udalak, 2022-2023 ikasturtean zehar, Gipuzkoako Foru Aldundiarekin eta Astigarragako Herri Eskolako Guraso Elkartearekin lankidetzan; eta azkeneko bi saioak egingo dituzte datozen egunetan. Horietan, haurraren garapena eta adimen emozionala izango dituzte hizpide, aurrekoetan sexu heziketa eta ingurune digitala aztertu ondoren.
Datorren ostegunean, apirilaren 27an, izango da bi saio horietan aurrenekoa. Eider Fernándezek eskainiko du hitzaldia, arratsaldeko 18:00etan Erriberan: Haurtzarotik nerabezarora, seme-alaben bidelagun. Adin tarte horretan ematen diren aldaketak ezagutzera eman eta landuko ditu Fernándezek, eta helburua izango da gurasoei baliabideak eskaintzea, haurraren garapenaren laguntzaile eta bideratzaile izan daitezen.
Bigarrena, hitzaldi zikloari bukaera emango diona, maiatzaren 10erako antolatu dute. Nerea Mendizabalek eskainiko du, 17:00etan Erriberan: Familiako gatazkak eta estresa kudeatzeko pilulak. Saio horretan, hasteko, Mendizabalek aditzera emango ditu gatazka eta estres maila altua izatera eramaten gaituzten elementuak; eta ondoren, gakoak eskainiko ditu egunerokotasunean gatazkak gutxitzeko eta izandakoak ahalik eta modurik onenean kudeatzeako. Adibideetan oinarrituko du atal teorikoa, eta hausnarketarako eta galderak egiteko tartea ere zabalduko du.
Doako izenematea, hitzaldietan parte hartzeko
Aurreko saio guztiak bezala, doakoak izango dira azkeneko biak ere. Baina horietan parte hartzeko, ezinbestekoa izango da aldez aurretik izena ematea. Horretarako, 943 33 50 64 telefonora deitu behar da, edo euskaraetahezkuntza@astigarraga.eus helbide elektronikora idatzi. Dagoeneko zabalik dago izena emateko epea, bi hitzaldietarako.