Dirulaguntza lerro berri bat jarri du martxan Astigarragako Udalak, adingabeekin eta beren garapenarekin lotutakoa. Zehazki, Udalak diruz lagunduko du adingabeen garapenaren esparruan sortutako premien tratamendua. 40.000 euroko partida bideratu du horretara, eta dagoeneko aurkeztu daitezke eskaerak, udaletxeko erregistroan edo astigarraga.eus webgunearen bitartez. Epea urte osoan egongo da zabalik, baina partida agortu arte emango dira dirulaguntzak.
Bi ildo izango ditu dirulaguntza lerro berriak: ikasgai tronkaletan errefortzu akademikoa, eta hezkuntza-premia bereziko tratamenduak. Bateragarriak dira bi ildoak. Laguntza horien helburua da, «garapen prozesuan zailtasunak dituzten edo izateko arriskuan dauden adingabeei laguntzea, tratamendu profesionalen kostuan (fisioterapia terapeutikoa, terapia okupazionala, osteopatia, psikomotrizitatea, logopedia...) edota errefortzu akademikoan», azaldu du Udalak.
Kontxa Etxeberria foroa, dirulaguntzen iturburu
Udalak berak aditzera eman duenez, Kontxa Etxeberria foroan azaleratu zen gai horren inguruko kezka, eta gogoeta egin zuten gaiaren gainean: «Agerian geratu zen adingabeen kasu askok arreta goiztiarra edo tratamenduren bat jaso beharko luketela, garapen prozesuan dituzten beharrei erantzuteko. Ikusita Eusko Jaurlaritzak eskaintzen duen arreta goiztiarra (0-6 urte) motz geratzen dela eta itxaron-zerrenda luzea izaten dela, ideia sortu zen Udalak laguntza emateko tratamenduak ordaintzeko zailtasunak dituzten herriko familiei, haur guztiek beren garapen beharrei erantzun ahal izateko. Horrela, laguntza ekonomikoaren bidez, adingabeen garapen zailtasunak murriztu eta saihestu nahi dira, eta bide batez, horien eraginak eta ondorioak».
Edonola ere, argitu dute tratamendua edo errefortzua proposatu beharko dutela «osasun edo gizarte zerbitzuen babes sistemetako profesionalek», kasu guztietan. Beraz, dirulaguntza eskatzen duenak, eskaera-orriarekin batera aurkeztu beharko du profesional baten ziurtagiria, eskaera baliozkoa izan dadin. «Eta adingabea osasun, hezkuntza edo bestelako sistemaren baten hartzaile izan badaiteke ere, dagokion sistemaren eskaera egina izan beharko du, laguntzen eskatzaile izateko».
Dirulaguntzak jaso ahal izateko, zenbait baldintza bete beharko dira. Horiek eskuragarri daude udaletxean bertan eta astigarraga.eus atarian. Dirulaguntza, gehienez ere, 400 eurokoa izango da errefortzu akademikoaren kasuan, 750 eurokoa premia berezien tratamenduetan, eta 850 eurokoa bi ildoetan laguntza eskatuz gero.