Astigarragako Udalak hitzarmen bat sinatu berri du Correosekin. Hala, udalak bidalitako trafiko-zehapenak eta zergak Astigarragako Correosen bulegoan eta Estatu osoko bulego informatizatuetan ordaindu daitezke. Udaletik azaldu dute ordainketak egiteko erraztasunak jartzea dela hitzarmenaren helburua: «Aukera honen bidez, eguneroko kudeaketak errazten zaizkie bizilagunei, eta Udalarekin egin beharreko izapideak modu eroso eta hurbilean egiten lagundu».
Correosek Astigarragako bizilagunen eskura jartzen du ordainketak egiteko posta-igorpena, Correos Pay zerbitzuaren bidez, eta prozesua erraza dela zehaztu du Udalak: «Zergak eta zehapenak ordaintzeko eragiketa oso erraza da; izan ere, leihatiletako langileek ordainketa-gutuneko datuak sartu behar dituzte, eta, ondoren, ordainagiria ordaindu eta eman».
Gainera, ordainketak bulegoetan egiteko aukeraz gain, landa-eremuan banaketa egiten duten postarien bidez ere egin daitezke: «Landa-ingurunean banaketa egiten duten postarien bidez eta aipatutako ordainketa-gutuna erantsita, posible da Udalaren zerga-betebeharrak ordaintzea». Zerbitzuaren kostu finkoa, kasu hauetan, 1,95 eurokoa da.