Urduritasuna eta gogoa izango dira gaur protagonista astigartarren artean, itxaronaldi luze baten ostean, heldu da azkenean Astigarragako Kros Herrikoiaren aurreneko edizioa. Uztailaren 16an zen egitekoa, baina beroa zela eta atzeratu egin zen. Hori horrela, gaur ospatuko da, Astigarragako Kros Herrikoia, goizeko 11:00etan hasita eta 5,7 kilometroko ibilbidea osatu beharko dute partehartzaileek.
Ondorengo ibilbidea egin beharko dute astigartar korrikalariek: Kale Nagusitik abiatuko dira, eta Apeztegi plaza zeharkatuta, kultur etxe zaharrera joango dira, atzeko pasealekutik. Ondoren, Zarkumendegira doan bidegorritik egingo dute bide luzea: futbol zelaira joan eta buelta. Galtzaur kaletik sartuko dira bueltakoan, eta Donostia Ibilbidera iritsiko dira, herriko sarrerako errotondaren parean. Bertatik, Donostiako Ibilbide osoa egingo dute korrika, eta kupelaren errotondan emango dute buelta, hezegunera iristeko. Parkean barrena, elizaren ondoko aldapa igo eta jaitsita iritsiko dira Pelotari kalera, eta helmugarako bidea hartuko dute.
Izena emateko aukera, gaur ere
Gaur goizean ere izango da Astigarragako Kros Herrikoian izena emateko aukera, goizeko 10:00etatik 11:00etara bitartean, irteera gunean. 2007an edo lehenago jaiotako guztiek hartu dezakete parte. Sariak izango dira irabazleentzat, eta opariak zozketatuko dituzte partehartzaileen artean.