Datorren igandean jokatuko da, azkenean, Astigarragako Kros Herrikoiaren aurreneko edizioa. Uztailaren 16an behar zuen, Santio Jaietarako beroketa gisa; baina beroagatik atzeratu behar izan zuten. Hori horrela, urriaren 2an izango da, goizeko 11:00etan hasita, eta 5,7 kilometroko ibilbidea osatu beharko dute partehartzaileek.
Kale Nagusitik abiatuko dira, eta Apeztegi plaza zeharkatuta, kultur etxe zaharrera joango dira, atzeko pasealekutik. Ondoren, Zarkumendegira doan bidegorritik egingo dute bide luzea: futbol zelaira joan eta buelta. Galtzaur kaletik sartuko dira bueltakoan, eta Donostia Ibilbidera iritsiko dira, herriko sarrerako errotondaren parean. Bertatik, Donostiako Ibilbide osoa egingo dute korrika, eta kupelaren errotondan emango dute buelta, hezegunera iristeko. Parkean barrena, elizaren ondoko aldapa igo eta jaitsita iritsiko dira Pelotari kalera, eta helmugarako bidea hartuko dute.
Lasterketan izena emateko epea gaur zabalduko dute, eta ostiralera arte apuntatu daiteke, kiroldegian. Egunean bertan ere izango da aukera, irteera gunean, 10:00etatik 11:00etara. 2007an edo lehenago jaiotako guztiek hartu dezakete parte, eta doakoa da. Sariak izango dira irabazleentzat, eta opariak zozketatuko dituzte partehartzaileen artean.