Lehenengo urteurrena beteko du Astigarragako Emakumeon Etxeak, asteburu honetan: joan den urteko irailaren 25ean inauguratu zuten, makina bat emanaldirekin.
Eta beste festa batekin ospatu nahi dute aurreneko urtebetetzea, gaur bertan. Lau hitzordu jarri dituzte, Emakumeon Etxean bertan; eta doakoak izango dira guztiak.
Hamaiketakoarekin hasiko dute ospakizuna, goizeko 11:00etan; eta Konfinatu ezinezko ahotsak dokumentala ikusiko dute segidan, Basauriko Kiskali Gazte Talde Feministak egindakoa.
Ondoren, inaugurazio ekitaldian bezala, ez du hutsik egingo Sorginbanda Batukada Feministak, 13:30etan. Eta bazkari baten bueltan elkartuko dira gero.
Arratsaldean, berriz, umorearekin izango dute zita, Beatriz Egizabal lasartearraren bisita jasoko baitute, Magma Mia bakarrizketarekin.
Bakarrizketa feminista, baina umoretik gehiago duena ikuskizuna
Magma Mia bakarrizketa feminista da; militantziatik asko, baina umoretik are gehiago duen ikuskizunak ikusle potentzial desberdinetan gogoeta eta barreak eragitea du helburu.