Urte berezia da aurtengoa Gure Izarra elkartearentzat, eta, bereziki, aurrerantzean beti oroitzekoak ari dira izaten azken egun hauek. «Urteko astebururik garrantzitsuena izan da pasa dugun hau», kontatu dute bertako ordezkariek. «Elkarteko beteranoak omendu ditugu, San Inazio bezperan elkartea bete zen bazkideen afarian, igandean Eragiyok abesbatzak kantuz bete zituen Astigarragako kaleak...», zehaztu dute. Aurten, mende oso bat bete dutela ospatu du elkarteak, eta, horren haritik, hainbat ekintza eta ekitaldi prestatu dituzte. Santio Jaien hasierako txupinazoan, esaterako, elkartea izan zen aurtengo omendua.
Martxa hori hartuta, dagoeneko erabaki da elkarteko logo berriaren irabazlearen izena: Pilar Eraunzetamurgil. «Izarra mantendu nahi izan dut irudi aktualagoa irudikatzeko asmotan», kontatu du. «Marraztutako borobilekin asmoa izan da jendea irudikatzea, izarraren barrura, elkartean parte hartzera doazela irudikatuz».
