Santio Jaiak berotzen hasteko, ohi bezala, hainbat ekintza antolatu dituzte asteburu honetarako, Astigarragan. Horrela, larunbat arratsaldean, Kros Herrikoia izango da, herriko kaleetan. 17:00etan abiatuko dira korrikalariak, Kale Nagusitik (esne makinaren paretik), eta 5,7 kilometroko ibilbidea osatu beharko dute, Zarkumendegira joan-etorria eginda, besteak beste. 15 urtetik gorakoentzat izango da, eta doakoa da, baina izena eman beharko da: ostiralera arte kiroldegian, eta larunbatean irteera gunean 16:00etatik 17:00etara. Saria izango dute aurreneko emakumeak eta gizonak, eta opariak zozketatuko dituzte partehartzaile guztien artean. Lasterketaren ondoren, Beietz taldearen kontzertua izango da Joseba Barandiaran plazan, 19:00etan hasita.
Iganderako, berriz, beste bi hitzordu jarri dituzte. Orientazio proba egingo dute goizean, familian: gurasoak, seme-alabekin batera. Andre Gobadarien ibai parkean egingo dute, 10:30etatik 12:30etara. Egunean bertan eman beharko da izena, 10:00etatik 12:00etara, doan. Opariak zozketatuko dituzte probaren bukaeran.
Eta asteburua borobiltzeko, maila haundiko esku pelota jaialdia prestatu du Mundarrok Txomiñenen, igandean 17:15etan, hainbat profesional ohiekin. Aurreneko partiduan, Barandiaran eta Apezetxea ariko dira, Arretxeren eta Gurutzealderen kontra; eta bigarrenean, Xala eta Alduntzin, Bengoetxearen eta Santxezen kontra. Doakoa izango da sarrera.