Ekaineko kultur agendaren barruan, musika izango da biharko protagonista, Astigarragan. Oraingo honetan, gainera, berezia izango da hitzordua; izan ere, Aiztondo abesbatzak eta Txirrisklako txistulariek bat egingo dute astigartarrei kontzertua eskaintzeko. Bazkalaurretik izango da emanaldia, 13:00etan, Erriberako atarian.
Ez da nolanahiko ikuskizuna izango, euskal folkloreko doinuak aurkeztuko baitizkiete Erriberara hurbiltzen diren guztiei. Hori horrela, bertaratzeko deia luzatu diete herritarrei, bi taldeak uztartuta, Aiztondoko kideen ahotsarekin eta Txirrisklako txistularien erritmoarekin, emanaldi borobila izatea espero baita.
Martxa ederra izan du Aiztondok azken aste hauetan. Denera, hiru agerraldi izan ditu ekainean, eta bikain aritu da abesbatza. Ekainaren 11n izan zuen 25. urteurreneko emanaldia, eta biharko kontzertuarekin, jarraipena emango dio ibilbideari.