Gipuzkoako Txapelketako kontsolazioko hiru final jokatuko dituzte gaur arratsaldean, Astigarragako Txomiñene frontoian, 19:00etan hasita. Eta horietako batean, Xuban Goñi astigartarra ariko da. Lau t'erdiko ekialdeko finala jokatuko du, kadeteen lehenengo mailan; eta Oiarpeko Manex Olaiz izango du kontrario.
Aurreneko partiduan, berriz, infantilen lehenengo mailako ekialdeko finala jokatuko dute, binaka: Añorgako Aiert Aburuza eta Ander Pagola, Pagazpeko Aimar Alejoren eta Enaitz Errastiren kontra. Eta jaialdiko hirugarren partiduan, Iñigo Labaka hernaniarrak jokatuko du lau t'erdiko ekialdeko finala, nagusien lehenengo mailan, Epleko Adur Etxezarretaren kontra.
Beste final asko jokatuko dira asteburu honetan, Gipuzkoa osoan zehar. Eta horietako batean, Oier Galarraga eta Enaitz Isasti astigartarrak ariko dira. Infantilen bigarren mailako ekialdeko finala jokatuko dute, binaka, Orioko Ganix Minerren eta Etxahun Sukiaren kontra.