Ekintzez betetako asteburuaz gozatzeko tartea izan dute astigartarrek, izan ere, ekitaldi mordoa egin dira asteburuan zehar, besteak beste, Udaberri giroan ekitaldia, Mundarroren 40garren urteurrena, eta kontzertu akustikoa, Erriberan.
Sagardoetxeak eman zion hasiera asteburuari, jardunaldi berezi bat antolatuz udaberria ospatzeko: Udaberri giroan izenekoa, hain zuzen ere. Ekitaldi honek, Astigarragako Antzerki Eskola, Astigar Dantza Taldea eta Norberto Almandoz Musika Eskolako ikasleen antzerkia, musika eta dantza emanaldiak uztartu zituen. Eguraldiaren laguntzarekin, giro ederraz gozatu zuten herritarrek Sagardoetxean, eta gainera, Sagardo abenturazaleak emanaldia ikusteko aukera ere izan zuten, eta noski, sagardoaren historia eta kultura gehiago ezagutzeko aitzakia ederra izan zen.
Udaberri giroan ekitaldia ez zen goizeko ekintza bakarra izan, Mundarrok 40garren urteurrena ospatu baitzuen Zarkumendegin. Futbolin txapelketarekin hasi zuten eguna, eta jarraian kale futbolari eman zioten hasiera. Eguerdian, 40garren urteurreneko zozketa ere egin zuten, eta goizari amaiera emateko, puzgarri eder batzuk Zarkumendegi apaindu zuten, eta noski, etxeko txikiek ederki pasa zuten.
Kontzertu akustikoak, Erriberan
Ekitaldiz gain, astigartar askok, Elenitaka, Apalatxe eta Paradoxus Luporum taldeek eskainitako kontzertu akustikoak entzuteko aukera izan zuten. Gazteria sailak antolatutako kontzertua izan zen, eta gustura egon ziren astigartarrak musikaz gozatzen.
