Oporraldiko kale erdi hutsei eta eguraldi grixari erremedio ederra jarri zioten atzo, Astigarragan. Gazte Sortzaileen Azoka egin zuten bigarrenez, Astigarragako Gazte Asanbladak antolatuta; eta bisitari ugari gerturatu ziren postuetara, herriko sortzaileen lanak ikusi eta erostera.
20 postu inguru jarri zituzten, herriko lau plazatan banatuta: Emakumeon Plazan, Joseba Barandiaranen, Norberto Almandoz plazan eta Kontxa Etxeberria plazan. Egun osoan zehar egon ziren bertan, goizeko 11:00etatik arratsaldeko 19:00etara; eta giro polita sortu zen, bereziki bisitari gehien izan ziren orduetan.
Koloretsuak izan ziren postuak, eta mota guztietako produktuak izan zituzten aukeran herritarrek: kamixetak, jertseak, poltsak, motxilak, karterak, belarritakoak, pultserak, lepokoak, txanoak, buruko zintak, haurrentzako zapatak, koadernoak, gerrikoak, ukenduak... Bukaeran, gainera, zozketa berezia egin zuten, azokan produkturen bat erosi zuten guztien artean. Ameba eta Zulo taldeen kontzertuarekin borobildu zuten eguna.