Ingurumen-heziketarako proiektua da Txoribox, Aranzadi Zientzia Elkarteak bultzatutakoa, eta hegaztiekin lotutakoa. Eta asteburu honetan, Astigarragan egingo du geldialdia: Murgia Jauregian jarri dute hitzordua, goizeko 10:00etan. Bertan, habia-kutxak kokatu zituzten, duela urte batzuk; eta horien jarraipena egingo dute larunbatean: «begiratuko dugu zer dagoen habia-kutxen barruan, eta ondoren, prest utziko ditugu aurtengo umatze-garairako», azaldu dute.
Eta habia-kutxen jarraipena egin ondoren, inguruko hegaztiak behatzeko aukera ere izango dute bertaratuek. Horretarako, prismatikoak eramatera animatu dituzte. Ordu eta erdiko saioa izango da, 11:30ak arte.
Naturaren kontserbazioaz sentsibilizatzea, helburu
Ingurumenarekin lotuta, hainbat helburu ditu Txoribox proiektuak: naturaren kontserbazioaren garrantziaz sentsibilizatu eta kontzientziatzea; izaki bizidunen eta ingurugiroaren babesaren aldeko jarrera positibo eta arduratsua garatzea; gure ondare naturalaren gaineko ezagutza zabaltzea; birziklapena eta hondakinen berrerabilpena bultzatzea; herriko parkeetako faunaren biodibertsitatea handitzen laguntzea... Horretarako, inguruko naturaz eta hegaztiez baliatzen dira, tailer eta irteera ezberdinak proposatuz, «gure ondare naturala gertutik ezagutu ahal izateko».