Ez da oso ohiko modalitatea zesta punta, Urumea bailarako gazteen artean. Baina bada gaztetxo bat Astigarragan, maila ederrean ari dena: zesta puntako Udazken Saria irabazi du Ander Mendizabalek, Igor Enbil zumaiarrarekin batera. Donostia Jai Alai taldean ari da astigartarra.
Aurreko ostiralean jokatu zituzten txapelketako finalak, Mutrikuko Miruaitz frontoian; eta alebin B mailan aritu zen Mendizabal, Enbilekin. Aurrez aurre izan zituzten Pablo Paniagua (Danok Bat) eta Eñaut Goñi (Zumaia), eta 2-0 nagusitu ziren. Lehiatua izan zen aurreneko jokoa, 13-10 irabazi zutena; baina erosoago nagusitu ziren bigarrenean (13-6).
Txapelketa borobila osatu du astigartarrak. Ligaxkan, bost partidu jokatu zituen, bakoitza bikotekide ezberdin batekin; eta bostetan lortu zuen garaipena, 10 joko irabazi eta bakarra galduta. Horrela, bera izan zen alebin B kategoriako aurrelari onena, eta Enbilekin tokatu zitzaion finala jokatzea. Eta ligaxkan bezalaxe, finalean ere ez zuen hutsik egin astigartarrak.