Joan den astean, gonbidatu bereziak izan zituen Kronikak. Astigarragako Herri Eskolako bosgarren eta seigarren mailako ikasleek bulegora egin zuten bisita, asteartean eta ostegunean. Egunkariko eguneroko lana zein den ezagutzeko aukera izan zuten eta, horrez gain, Kronika sortu zenetik gaur egunera arteko aldaketen eta berrikuntzen berri ere izan zuten.
Pozgarria da Kronikako lantaldearentzat Urumea bailarako ikasleak egunkarian izatea eta bertako funtzionamendua ezagutzea. Izan ere, garrantzitsua da bailarako herritarrek jakitea egunero-egunero aleak argitaratzeko Kronikak egiten duen ibilbidea, informazioa jasotzeko kanaletatik hasi eta banaketa-puntuetara heldu artekoa. Horregatik, datorren hilabetean, Aratz Ikastolakoen txanda izango da. Gainera, nork daki, agian, etorkizuneko kazetariak edo langileak egon daitezke bailarako eskoletan, eta horregatik, esku zabalik egingo diegu harrera bertaratzen direnei.
