Urtea ekintza ugarirekin hasi dute astigartarrek. Hain justu, kultura arduradunek makina bat jarduera aurkeztu dituzte hilabete honetako egitarauaren barruan. Eta, erritmo horri jarraituz, gaurkoan, zirkua izango da Erriberan. Piti Peta hofen show emanaldia eskainiko dute hiru artistak, arratsaldeko 17:00etan hasita.
Ikuskizun berezia izango da; izan ere, hainbat herrialdetako malabaristak igoko dira oholtza gainera. Denera, hiru dira gaurko protagonistak: Andres Torres, Coriakoa (Extremadura); Hannes Bahoffer, Friburgokoa (Alemania); eta Lucas Castelo Branco, Salvador de Bahíakoa (Brasil).
Hiruren artean, umorea, artea eta malabarismoaren diziplina uztartuko dituzte ikuskizun bikaina eskaintzeko asmotan. Gainera, malabaristek azaldu dutenez, «unibertso absurdu batean gertatzen diren egoera umoretsuak» kontatuko dituzte. Horrela, beraz, ikuslegoa aho zabalik uzteaz gain, barre-algarak ere ziurtatuta egongo dira.
Haurrentzat, gazteentzat zein helduentzat zuzendutako emanaldia da gaur eskainiko dutena. Umoretsu adierazi dutenez, ez dute «inor» kanpoan uzten: «txikienetik hasi eta zaharreneraino dira ongi etorriak gure zirkura; noski, ez dago adin tarte edo kolore bereizketarik, eta edonor etor daiteke, txakurrak eta tximuak barne!». Horregatik, bertaratzeko deia luzatu diete herritar guztiei.
Sarrerak salgai daude Erriberako leihatilan eta online
Zirkura bertaratzeko interesa dutenek, salgai dituzte ikuskizunerako sarrerak. Eskuragai egongo dira Erriberako leihatilan emanaldia hasi baino ordubete lehenago edo, bestela, online ere erosteko aukera dago www.astigarraga.eus webgunean: haurrentzat 3 euroan eta helduentzat, berriz, 6 euroan.