Gaur arratsaldeko 20:00etan musika eta dantzarekin hitzordua dute astigartarrek. Izan ere, 'Arah' ganbera musika taldeak, Bazen behin musika eta dantza emanaldia eskainiko du, Erriberan. Taldea osatzen dute Euskadiko orkestrako musikariek: Sara Zufiaurre (klarinetea), Gabriel Mesado (biolontxea), Delphine Dupuy (biola), Raquel Cortinas (bigarren biolina) eta Larraitz Oiartxabal (lehen biolina). Musikariez gain, dantzariak ere izango dute protagonismoa gaurko emanaldian: Garazi Etxaburu eta Miren Lizeagak hain juxtu.
«Euskal Kultura josi duten musika obren moldaketetan dago ekimenaren muina»
Bazen behin, ARAH taldea
Emanaldi honek Euskal tradizioa abanguardiara ekartzeaz gain obra berriak aurkeztea du helburu, «sorkuntza aldarrikatuz». Hein handi batean, Euskal Kultura josi duten musika obren moldaketetan dago ekimenaren muina. Tradizioaren elementuak abiapuntu harturik, dantza garaikidearekin eta perkusioarekin fusionatzen den ikuskizuna da. Bazen behinek, antzinako kontakizunak eguneratzeari egiten dio erreferentzia. Adierazpen berrien sorkuntzarako elezaharrak norberarengan nola iragazten diren kontuan izanik, mintzamen anitzen aberastasunari ipini nahi dio argia, garaikidetasunari leku bat eskainiz baina sustraiekiko begirada arduratsua mantenduz. Emanaldiko sarrerak 8 euro balio du helduentzat eta 4 euro txikientzat.