Ahots eta doinu bereziekin agurtuko du urtea, Erribera kulturguneak. Izan ere, Ispirit taldeak kontzertua eskainiko du bertan, gaur iluntzeko 20:00etatik aurrera. Gospel-soul taldea da Ispirit, eta «indarrez eta erritmoz betetako emanaldia» eskainiko du, Lidia Insausti, Noa Egiguren eta Lide Hernando abeslarien eskutik, lau musikarirekin batera. A sweet inspiration ikuskizuna eskainiko dute, gospelaren emakume ahots ezagunetako batzuk ekarriz, eta baita souleko zenbait abesti espiritual ere.
Emanaldirako sarrerak salgai daude, astigarraga.eus webgunean, edota Erriberan bertan: helduenak 4 euroan, eta adin txikikoenak 2 euroan.
Sarrerak agortuta, 'GO!azen 8.0' bi saioetarako
Eta urte hau bukatu bezala, musikarekin hasiko da datorrena ere, Erriberan. Bi kontzertu eskainiko dituzte GO!azen 8.0 telesaileko protagonistek, urtarrilaren 2an: arratsaldeko 17:00etan aurrenekoa, eta 19:00etan bigarrena. Bertan, elkarrekin arituko dira GO!azeneko pertsonaia ezagunak eta berriak, telesailaren denboraldi ezberdinetako kantak eskaintzeko.
Bi emanaldietarako sarrerak abenduaren 20an eta 27an jarri zituzten salgai, eta dagoeneko agortuta daude.