Gabonei ongietorri beroa emateko, musikaz beteko ditu datozen egunak, Norberto Almandoz musika eskolak. Eta aurreneko hitzordua, denetan bereziena, igande honetarako jarri du, Aiztondo abesbatzarekin batera: Gabonetako kontzertua eskainiko dute, eguerdiko 12:30etan Erriberako areto nagusian, musika eskolako ikasleek, Aiztondoko abeslariekin batera.
Bertan, parte hartuko dute musika eskolako haizezko instrumentuen joleek eta taldeek, abesbatzek, eta bi solistak.
Parte hartuko duten ikasleen senideentzat, bi sarrera gorde ditu musika eskolak; eta gainerako sarrerak mugatuak izango dira. Doakoa da, baina aldez aurretik egin behar da erreserba, sarrera gutxi izango baitira. Horretarako, musika eskolara jo edo deitu (943 55 73 40).
Ikasleen entzunaldiak, datorren astean: haizezko instrumentuak eta pianoa
Gabonetako kontzertuari, beste hiru saiok emango diote segida, datorren astean, aste berezia borobiltzeko. Izan ere, ikasleen entzunaldiak izango dira musika eskolan, abenduaren 14an, 17an eta 18an.
Asteartean, haizezko instrumentuen ikasleek eskainiko dute entzunaldia: tronpeta, bonbardinoa, saxofoia, klarinetea, zeharkako txirula eta txistua izango dira entzungai. Arratsaldeko 18:00etan izango da.
Ostiralean, berriz, pianoko ikasleek bi entzunaldi eskainiko dituzte, arratsaldeko 17:30etan eta 19:00etan. Eta pianoa izango da protagonista larunbatean ere, entzunaldiei bukaera emateko. Eguerdiko 12:30etan izango da azkeneko hori. Mugatua da aforoa, entzunaldietarako ere.