Hitzordu garrantzitsua daukate Erriberan, gaur eta bihar, indarkeria sexistaren kontrako borrokak eta Harituz elkarteak. Laugarrenez antolatu du Pentsamendu Feminista Topaketa, eta oraingoan, nesken kontrako indarkeriak ekarriko dituzte erdigunera. Joan den astelehenean, urriaren 11n, izan zen Nesken Nazioarteko Eguna; eta horren harira, mahai gainera ekarri nahi izan dituzte, haurrek, neska jaiotze hutsagatik, jasan behar izaten dituzten jazarpen eta indarkeriak.
«Helburua da, ikusaraztea emakumeen aurkako diskriminazioak haurtzarotik hasten direla. Emakumeen genitalen mutilazioa, behartutako ezkontzak, bortxaketak... Adibide batzuk baino ez dira. Hezkuntzarako sarbiderik eza, eta ondorioz, aukera berdintasun txikiagoa ere ematen da. Halaber, alabek legeetan eta praktikan, lurrak eta ondasunak oinordetzan jasotzeko dituzten eskubideak ere diskriminatzen dira. Eta leku batzuetan, Indian edo Txinan adibidez, abortu selektiboak egiten dira, sexua jakina denean», azaldu du Harituzek.
Indarkeria horiei «diziplina anitzeko ikuspegi batetik» heltzea da topaketaren asmoa, «baina ibilbide-orri komun batekin: nesken eskubideen urraketak».
Piplantri herriko ohitura, praktika onen adibide
Gaur emango diote hasiera aurtengo topaketari, Hermanas de los árboles dokumentalaren eskutik, 18:00etan Erriberan. Eta nesken aurkako indarkeriak baino, kontrako adibide bat da aditzera emango dutena: Piplantri herrian, Rajastanen (India), 2006tik egiten duten praktika bitxia. Bertan, neska bat jaiotzen denean, 111 zuhaitz landatzen dituzte haren omenez; eta zuhaitz horien frutarekin lortzen duten diruarekin, neska horren heziketa eta dotea ordaintzen dute. Gainera, zuhaitzak landatzearekin batera, zinpeko adierazpen bat sinatzen dute familiek: alabak hezkuntza osoa jasoko duela, eta ez dela ezkonduko 18 urte bete baino lehenago. «Benetako istorioa da, nesken eskubideen alde lan egiteko modu asko daudela erakusten duena», diote.
Doakoa izango da emanaldia, eta ondoren, solasaldia ere egingo dute, «Argentinarekin eta Indiarekin konektatuz».
Gaian «esperientzia haundia» duten hizlariak, bihar
Bihar izango du segida Pentsamendu Feminista Topaketak, eta egun osoko programa prestatu dute. Nesken eskubideen garrantziaz kontzientziatu nahi dituzte herritarrak, topaketa hauen bitartez. Eta horretarako, gaiaren gainean «esperientzia haundia» duten hizlariak ekarriko dituzte, «hainbat arlo profesionaletatik» jorratuko dutenak. «Errealitate krudel honen ikuspegi ezberdin eta osoa aurkeztu nahi dugu topaketan, eskatzen duen zeharkakotasuna ikusarazten saiatuz».
Goizeko 09:00etan irekiko dituzte ateak, eta 09:30etan emango diote hasiera topaketari, Jéssica Murillo eta Garbiñe San Miguel kazetarien eskutik. Beraiek arduratuko dira aurkezpenak egiteaz. Lau hitzaldi izango dira goizean, eta eguerdiko atsedenaren ondoren, beste hiru hitzaldi eta emanaldi bat arratsaldean. Eta bukatzeko, II. eta III. Matazak Sariak banatuko ditu Pilar Vicente de Forondak, emakumeen eta neskatoen eskubideen alde eta indarkeria matxistaren aurka egindako lanean nabarmendu diren erakundeei. 7N Plataformak jasoko du II. Matazak Saria, eta Medicus Mundi Gipuzkoako III. Saria.
EGITARAUA - URRIAK 16
09:30-10:00, Inaugurazioa
10:00-11:00, Arantza Campos: Nesken eskubideen urraketa. Garapen jasangarrirako 2030 agenda eta bere 17 Garapen Iraunkorrerako Helburuak.
11:00-12:00, Fátima Djarra: Neska jaiotzearen bekatua herrialde perimetraletan, ezkontza behartuak eta emakumeen mutilazio genitala.
12:30-13:30, Ebbaba Hameida: Gehiengo musulmana duten eta gatazkan dauden herrialdeetan neska jaiotzearen prezioa informazio tratamenduan.
13:30-14:30, Carmen Ruiz Repollo: Pornosozializazioa, haur eta nerabeentzako arrisku faktore gisa.
16:00-17:00, Isabel Guerrero: Sexu-heziketa eta nesken ahalduntzea.
17:00-17:30, Marian Moreno Llaneza: Hezkidetza aldaketa faktore gisa: Skolae proiektua.
17:30-18:30, Mahai ingurua: Nesken eskubideen aldeko lana elkarte mugimendutik. Medicus Mundi Gipuzkoa, Euskal Elkartasun Feminista, 7N Plataforma, Clásicas y Modernas, Save a Girl Save a Generation.
18:30-19:00, Malala Yousafzairen omenezko emanaldia, After Perdicesen eskutik: Guerreras de las palabras.
19:00-19:30, II. eta III. Matazak sarien banaketa, Pilar Vicente de Forondaren eskutik.
19:30-20:00, Indarkeria Sexistaren Aurkako Matazak mugimenduaren liburuen zozketa.