Berdintasunarekin lotuta, bi hitzordu jarri dituzte Astigarragan, gaur arratsalderako: Locas por las herramientas ikastaroaren aurreneko saioa eskainiko dute, Emakumeon Etxean; eta Udazkeneko kanpamendua tailer zikloari ere hasiera emango dio Harituz elkarteak, Erriberan.
Arratsaldeko 17:00etan hasiko da Locas por las herramientas ikastaroa, Paz Carbajosaren eskutik; eta hiru ordukoa izango da, 20:00ak arte. Abenduaren 8ra arte egingo dute, eta emakumeei bakarrik zuzenduta dago. Doakoa da ikastaroa, baina parte hartzeko, aldez aurretik eman behar da izena, emakumeonetxea.astigarraga@gmail.com helbide elektronikora idatzita.
Harituzek, berriz, hiru tailerreko zikloa antolatu du urrirako, Erribera kulturgunean. Saio horietan, hainbat gai aztertuko dituzte, ikuspegi feministatik, Skolastikaren eskutik. Gaurkoa izango da aurrenekoa, Mujeres dibujan mujeres: biografías en comic, eta arratsaldeko 18:00etatik 20:00etara egingo dute. Hurrengo biak, datozen bi asteazkenetan izango dira, ordutegi berean: Mascotas y literatura, urriaren 13an; eta E(ra)gile afroamerikarrak, hilaren 20an.
Doakoak izango dira tailer guztiak, baina izena eman behar da, emailez, helbide honetan: astiharituz@gmail.com. Edonola ere, tailerrak bertatik bertara jarraitzeaz gainera, aukera izango da internet bidez zuzenean ikusteko ere; eta saioaren ondoren, Skolastikaren YouTubeko kanalean jarriko dituzte ikusgai, osorik.