Emakumeon Etxearen lokala egokitu eta hobetzeko lanak hasi ditu Astigarragako Udalak, aste honetan. Abuztuaren bukaerara arte luzatuko dira obrak, eta guztira, 35.000 eurokoa da gauzatzeko aurrekontua.
Horrela, lokalerako sarrera hobetuko dute: haunditu egingo dute egungo ataria, Joseba Barandiaran plazakoa, irisgarritasun baldintzak betetzeko; eta bigarren sarrera bat ere eraikiko dute lokalaren atzeko aldean, Tomas Alba kaletik. Bi ateetan jarriko dute txirrina.
Bestalde, leiho gehiago jarriko dituzte, lokalaren aireztapena hobetzeko; eta suteen aurkako bitartekoak egokituko dituzte. Fatxadan, berriz, hautsita dauden harriak konponduko dituzte, eta bi armazoi jarriko dituzte, ondoren muralak egiteko. Eta azkenik, komunak konponduko dituzte, eta pixatokia kenduko dute.