Datorren astearterako hitzordua aurreratu, eta ezohiko deialdian egingo du Plenoa Astigarragako Udalak, gaur eguerdian. Udaletxeko pleno aretoan izango da, 12:00etan hasita; eta gai garrantzitsuak landuko dituzte.
Izan ere, besteak beste, bozkatuko dituzte DBHri dagozkion bi puntu: DBHrako partzelaren zati baten kalifikazio juridikoa aldatzea; eta DBHren eraikina egiteko lurrak Eusko Jaurlaritzari doan uztea.
Bestalde, hizpide izango dute Erribera kulturgunearen araudia; Sagardoetxearen etorkizunari buruzko herri galdeketa; eta HEA 21 Zarkumendegi eremuko hiritartze-proiektua. Eta hiru kontratazio espedienterekin bukatuko dute Plenoa: lorezaintza zerbitzuari dagokiona; gizarte eta hezkuntza arloko esku-hartzea eta esku-hartze psikosozialari buruzkoa; eta Santiomendiko natur eskola eta aterpetxe zerbitzuarena.