Jairik ez izan arren, egun seinalatuez gozatzeko aukera izango dute astigartarrek, gaurtik. Lau egunetako kultur programazioa prestatu dute, eta haurrentzako bingoak eta musikak emango diote hasiera.
Arratsaldeko 16:00etan hasiko da bingoa, Herri Eskolako atarian, Xaguxar Aisialdi Taldeak antolatuta. Aurrena, 2014 eta 2017 urteen artean jaiotakoak ariko dira bingoan, heldu baten laguntzaz; eta ondoren, 2009-2013 artean jaiotakoen txanda izango da, bakarrik.
Bingoa bukatzean, herriko bi taldek alaituko dituzte kaleak eta plazak, musikarekin. Aurrena, kalejiran abiatuko dira Txirrisklako txistulariak; eta segidan, bere emanaldia hasiko du Zo-Zongó taldeak, Kontxa Etxeberria plazan.
Txistu eta perkusio doinu horiekin ez da bukatuko musika, gaurkoz. Izan ere, Liher taldeak ere eskainiko du kontzertua gaur gauean, Kontxa Etxeberria plazan bertan.
Zo-Zongó eta Liher taldeen emanaldietarako, aldez aurretik eskuratu behar ziren sarrerak, doan.
GAURKO EGITARAUA
16:00, Haurrentzako bingoa, Herri Eskolako atarian. Xaguxar Aisialdi Taldeak antolatuta. Txartelak aldez aurretik eskuratu behar ziren. 16:00etan izango da 2017-2014 urteetan jaiotakoentzat, heldu batekin; eta 17:30etan 2013-2009 urteetakoentzat, bakarrik.
19:00, Txirriskla taldeko txistulariak, kalejiran.
19:15, RocKalean: 'Rock n' Rolla gordinean', Zo-Zongó taldearen emanaldia, Kontxa Etxeberria plazan.
22:30, Liher taldearen kontzertua, Kontxa Etxeberria plazan.