Ezohikoak izango dira uztailaren bukaerako egun seinalatuak, aurten ere, astigartarrentzat. Ez da jairik izango Santioetan, une honetako egoera zailak segurtasun neurri guztiak betetzea exijitzen duelako. Baina, behintzat, kulturaz lasai gozatzeko aukera zabala izango dute herritarrek, datozen egun berezietan. Izan ere, lau eguneko egitaraua prestatu dute, Udalak eta herriko hainbat eragilek elkarlanean, etzitik astelehenera.
Xaguxarrek haur eta gaztetxoentzat prestatu duen bingoarekin hasiko da programazioa ostiralean, eta Txirrisklako txistularien kalejirak, Zo-Zongo taldearen emanaldiak eta Liher taldearen kontzertuak emango diote segida.
Hain justu, musika izango da protagonista nagusia, lau egun horietan zehar: Jesus Trincadoren bi saio, Kita Del Pare txarangaren emanaldia eta Izaro abeslariaren kontzertua izango dira larunbatean; MC Onak taldeak joko du igandean; eta Kalakan taldeak astelehenean.
Baina musika baino gehiago izango da kultur egitarau berezian. Haurrentzako, bi ikuskizun izango dira asteburuan: Eidabe konpainiaren Gora kasete larunbatean; eta Ganso&Ciaren Panoli kabareta igandean. Dantza emanaldirik ere ez da faltako, eta igandean izango dute toki berezia: eguerdian, Gazte dantza ikuskizuna eskainiko dute Oinkarik eta Hikak; eta arratsaldean, Astigar dantza taldeak eskainiko du emanaldia.
Bertsolariak ere, igande arratsaldean izango dira protagonista: Jone Uria, Aitor Mendiluze, Aitor Sarriegi eta Nerea Elustondo ariko dira, Agin Laburuk eta Astigarragako bertso eskolako kideek jarritako gaiekin.
Eta astelehenean, hiru zita berezirekin emango diote bukaera egitarauari. Batetik, Gipuzkoako bigarren mailako Aizkolari Txapelketa jokatuko da Foru Plazan, bailarako zenbait aizkolarirekin. Bestetik, Urbasa txalaparta, zirku eta akrobazia ikuskizuna eskainiko dute Hutsun eta Ortzi taldeek. Eta azkenik, Balkan Paradise Orchestraren kontzertua izango da: Balkanetako doinuak eskainiko dituzte, Ioan Mihail Sabaila astigartarraren oroimenez, eta jai batzordean egin zuen lana eskertzeko.
Doako sarrerak, eskuragarri
Doakoak izango dira saio guztiak, baina emanaldi gehienetarako, sarrera eskuratu behar da aurrez: astigarraga.eus webguneko Sarrerak erosi atalean, edo Erribera kulturgunean. Sarrerarik geratuko balitz, emanaldiaren aurretik ere izango dira eskuragarri, bertan.
UZTAILAK 23
16:00, Haurrentzako bingoa, Herri Eskolako atarian. Xaguxar Aisialdi Taldeak antolatuta. Txartelak eskuragarri gaur arte. 16:00etan izango da 2017-2014 urteetan jaiotakoentzat, heldu batek lagunduta; eta 17:30etan 2013-2009 urteetakoentzat, bakarrik.
19:00, Txirriskla taldeko txistulariak, kalejiran.
19:15, RocKalean: 'Rock n' Rolla gordinean', Zo-Zongo taldearen emanaldia, Kontxa Etxeberria plazan.*
22:30, Liher taldearen kontzertua, Kontxa Etxeberria plazan.*
UZTAILAK 24
13:00, Jesus Trincado musikariaren 'Músicas del mundo' emanaldia, Sagardo plazan.
17:30, 'Gora kasete' haur ikuskizuna, Eidabe konpainiaren eskutik, Herri Eskolako atarian (euria eginez gero, Erribera kulturgunean).*
19:00, Kita Del Pare txarangaren emanaldia, Kontxa Etxeberria plazan.*
20:00, Jesus Trincado musikariaren 'Route 64-P, smooth jazz' emanaldia, Kale Nagusian.
22:30, Izaro abeslariaren 'Limones en invierno' birako kontzertua, Kontxa Etxeberria plazan.*
UZTAILAK 25
09:30, Txirriskla taldeko txistularien diana.
13:00, 'Gazte' dantza ikuskizuna, Oinkari eta Hikaren elkarlan artistikoa, Kontxa Etxeberria plazan.*
17:30, 'Panoli kabareta' haur ikuskizuna, Ganso&Cia konpainiaren eskutik, Herri Eskolako atarian (euria eginez gero, Erriberan).*
18:00, Astigar dantza taldearen emanaldia, kiroldegian.*
19:00, Bertsolariak, Kontxa Etxeberria plazan: Jone Uria, Aitor Mendiluze, Aitor Sarriegi eta Nerea Elustondo. Gai-jartzaile: Agin Laburu eta Astigarragako bertso eskola.*
22:30, MC Onak taldearen kontzertua, Kontxa Etxeberria plazan.*
UZTAILAK 26
13:00, Kalakan taldearen kontzertua, Kontxa Etxeberria plazan.*
18:00, Gipuzkoako bigarren mailako Aizkolari Txapelketa, Foru Plazan (euria eginez gero, Herri Eskolako atarian). Goldea elkarteak antolatuta.
18:00, 'Urbasa' txalaparta, zirko eta akrobazia ikuskizuna, Hutsun eta Ortziren eskutik, kiroldegian.*
20:00, Balkan Paradise Orchestra taldearen emanaldia, Kontxa Etxeberria plazan. Bartzelonako musikari taldeak Balkanetako doinuak joko ditu, Ioan Mihail Sabailaren eta bere jaioterriko Errumaniaren oroimenez, eta Astigarragako jai batzordean eginda zuen lana eskertzeko.*
*Izartxoarekin markatutako emanaldi guztietarako, sarrera eskuratu behar da aldez aurretik, doan, astigarraga.eus webgunean edo Erribera kulturgunean. Sarrerarik geratuko balitz, emanaldia hasi aurretik ere eskuragarri egongo dira bertan.
Gogorarazi eta nabarmendu dute, eraso sexista oro dagoela baztertuta kultur jarduera horietan.