Kontzertu berezia antolatu du Astigarragako Udaleko Gazteria Sailak, larunbat honetarako. Rap doinuak ekarriko dituzte Erribera kulturgunera, lau talderen eskutik: SNKT, Rushblacka, Northcousin eta Tibetan Clan.
Arratsaldeko 18:30etan hasiko da kontzertua, eta sarrerak dagoeneko salgai daude, 6 euroan, Zipotza tabernan eta Gazte Informazio Gunean (Erribera). Kontzertuaren egunean bertan, ordubete lehenago jarriko dituzte salgai azkeneko sarrerak, Erriberako takillan.
Ekainaren 28an, 'Lurrun minez' antzezlana
Eta beste emanaldi batekin itxiko dute ekaineko kultur ekitaldien agenda, Astigarragan. Izan ere, ekainaren 28an, Lurrun minez antzezlana eskainiko dute Erriberan, LGTBI+ pertsonen Eskubideen Nazioarteko Eguna ospatzeko. Arratsaldeko 19:00etan izango da. 16 urtetik gorakoei zuzendutako emanaldia da, eta sarrerak dagoeneko salgai daude: astigarraga.eus webguneko Sarrerak erosi atalean; eta Erriberan bertan, arratsaldez bakarrik, 16:00etatik 20:00etara. Helduen sarrerak 4 euro dira, eta adin txikikoenak 2 euro.
«Hiru maritxuren arteko drama psikologiko, sozial eta sexuala» da Lurrun minez antzezlana, gizonezkoen sauna batean gertatuko dena. Lurrun artean nahastuko dira desioak eta beldurrak, alkohola eta pasioa, boterea eta beste hainbat gai labainkor; baita umorea ere.