Pubertaroko eta nerabezaroko pornografiari buruz, gurasoei zuzendutako bi tailer antolatu ditu Astigarragako Udalak, datorren asterako. Asteartean eta ostegunean izango dira, maiatzaren 25ean eta 27an. Nerea Sancho Esnaolak eskainiko ditu biak, Astigarragako udal sexu eta bikote aholkularitzako arduradunak, 17:30etan hasita Herri Eskolako aretoan. Bi orduko saioak izango dira, eta horietan, arlo ezberdinak landuko dituzte.
Aurrenekoaren izenburuak, hainbat galdera planteatzen ditu, saioan bertan landuko dituztenak: Nire seme-alabak pornografia ikusten al du? Nola hitz egin gaiaren inguruan? Zein jarrera hartu? Zein baliabide eta estrategia erabili ditzaket? Haurrek interneterako sarbidea gero eta goizago duten honetan, gurasoen kontroletik kanpo gelditzen da pornografia eskura izatea: «ez badugu nahi pornografia izatea gure seme-alaben sexu hezitzailea, bere eraginari aurre egiteko estrategia eta baliabide eraginkorrak partekatu beharko ditugu. Sinesgarriak diren mezuak helaraztea beharrezkoa da, eta baita gure jarrera modu koherentean jakinaraztea ere. Hori konfiantzaz eta segurtasunez egiteko helduko diogu gaiari saioan, gogoeta eta elkartruke kolektiboaren bitartez», aurreratu dute.
Osteguneko saioan, berriz, landuko dituzte Pornografiaren kontrabalioei aurre egiteko babes neurriak eta trebetasunak.
Bi saioetan, azalpen teorikoez gain, baliabide praktikoak eta eztabaida ere izango dira; eta norbere errealitateari begira jarriko dira, «datorren etapa nola bizi nahi duten irudikatuz».
Parte hartzeko, izenematea
Tailerrean parte hartzeko, izena eman beharko da aldez aurretik: alkatetza@astigarraga.eus helbidera idatzi behar da, mezuaren gaian Pornoa DBH adierazita.