Ohiko festarik gabe, baina ospatu egin zuten San Isidro eguna, larunbatean, Astigarragan. Hamarretako mezari segida emanez, Foru Plazan elkartu ziren, eta udaletxeko arkupeetan egin zuten ekitaldi xumea.
Esker oneko hitz goxoak eskaini zizkieten Goldea Elkarteko Antton Arkak eta Xabier Urdangarin alkateak, herriko baserritar guztiei; eta bereziki aurten omendu dituzten zortziei: Larrabideko Juani Otaño, Bordatxoko Manu Zulaika, Lagatxagako Mari Karmen Zipitria, Etxeluzeko Ander Altuna, Guardiko Begoña Arbelaiz, Lizardiko Mikel Irizar, Oiarbideko Koro Zabalegi eta Ermañako Jose Antonio Zubillaga. Mikel Lertxundi eskultoreak egindako eskultura bana eman zieten, baserriari buruz egindakoa; eta aurreskua dantzatu zien ondoren, Astigar taldeko dantzari batek. Ez zuten huts egin Andoni Egaña eta Sebastian Lizaso bertsolariek ere, Astigarragako San Isidron; eta bertso bana eskaini zieten zortzi omenduei. Horrela zioen, esaterako, Egañak Mari Karmen Zipitriari eskaini zion bertsoak:
Mari Karmenek makina bat lan
egingo zuen bai Latxan
txikitatikan nagusitu arte
bere inguruan zaintzan.
Ta zure lana hor dago gure
jan-edanaren emaitzan,
horren beharra izango degu
zementuak jan ez gaitzan.
Lizasok, berriz, beste hau eskaini zion, Koro Zabalegiri:
Ta Korok ere Oiarbideri
atera hainbat etekin
bere aitaren babesarekin
neska koxkorretan ekin.
Sagardotegi edo baserri
bitan lana gogor egin,
ta hori dena guztiak hartuz
irripar goxo batekin.
Gainera, zortzi baserritarren mezuekin, murala osatu dute, eta ikusgai dago Foru Plazan bertan. Bi astez egongo da bertan, eta ondoren, plazaz plaza mugituko dute, datozen hilabeteotan, baserritarren ahotsa eta baloreak herrian zabaltzeko eta gizarteratzeko asmoz.