Sagardoetxeak hamabost urte bete ditu aurten. Ilusio haundiz ireki zituen ateak 2006ko irailean, eta orduztik makina bat ekintza egin dira bertan. Hori ez ezik, museoa ezagutzera bertaratu diren herritarrak ere asko izan dira. Sagastia eta museoa ezagutzeko aukera izan dute, eta bete-betean murgildu dira sagardoaren munduan. Sagardoetxekoek, gainera, goxotasunez egin die harrera haiena ezagutzera joan direnei, txoko hori baita beraien pasioa. Hain justu, bisita bakoitza berezia eta bakarra izatea nahi izan dute, eta horrexegatik egin dituzte banakakoak, taldekoak edota familiakoak, besteak beste.
Horren bueltan, urte hauetako guztietako hazkundea kontuan hartuta, Sagardoetxearen kudeaketan parte hartzen dutenek haren bilakaeraz hausnartzeko «beharra» ikusi dute. «Bidegurutze batean gaudela uste dugu, izan ere, aukera ezerdinak ditugu aurrez aurre etorkizunari begira: bide beretsutik jarraitu, bestelako gune bat planteatu beste eragile eta administrazio batzuekin, eta abar», azaldu dute.
Prozesuak, hiru urrats
Gaiaz hausnartzeko eta erabakiak hartzeko, hiru urrats nagusi emango dituzte. Lehenik, joan den hilean egindako Sagardoetxeari buruzko gogoeta eta diagnostikoa; bigarrenik, gaurkoan, etorkizuneko aukerak definitu eta galdeketa prestatuko dute; eta, azkenik, erabakiak hartuko dituzte, herri galdeketaren bidez.
Aurrez aipatu moduan, kultur etxe zaharreko aretoan izango da gaurko bilera, arratsaldeko 18:00etan hasita. Helburu «garbia» dute: «etorkizuneko aukerak aztertzea».
Horrez gain, parte hartze prozesu honi buruzko informazioa Udalaren webgunean dago eskuragarri: astigarraga.eus/eu/parte-hartu.