2021eko urtarrilaren 12an Astigarragako Udal Planteamenduari buruzko Aholku Batzordearen Araudia argitaratu zen Gipuzkoako Aldizkari Ofizialean. Batzorde honen eginbeharra, besteak beste, Udalak Plan Orokorraren inguruan hartzen dituen erabaki, ekimen, proposamen eta aukerak aztertzea da, «azken finean, hirigintza gaietan Udalaren jarduera gainbegiratzea eta aholkuak ematea» dio Astigarragako Udalak.
Parte hartzeko eskubidea duten hainbat eragile
Batzorde horretan parte hartzeko eskubidea dute ondoren zehaztuta dauden herriko pertsona eta eragileek. Udalak aipatu du «osaera anitza eta ugaria da», guztion ikuspegi, ekarpen eta iritziak jaso ahal izateko: Galtzaur Jubilatuen Etxea Elkarteko ordezkari bat, Goldea Elkarteko ordezkari bat, herriko kultur eragileen ordezkari moduan, Udaleko Kultur Batzordeak izendatutako ordezkari bat, mugimendu feminista ordeztuko duen udaleko Berdintasun Batzordeak izendatutako ordezkari bat, Astigarragako Gazte Asanbladako ordezkari bat, hurrengo Auzo Elkarteko ordezkari bana: Oialume, Ergobia, Santiagomendi eta Perurena, Astiko Merkatarien Elkarteko ordezkari bat. Mundarro Kirol Elkarteko ordezkari bat, Astigarragako Herri Eskolako Guraso Elkarteko ordezkari bat, Gipuzkoako Sagardogileen Elkarteko, Sagardo Mahaiko eta Sagardun Partzuergoko ordezkari bana eta poligonoetako jabe elkarteen ordezkari bana.
Aholku Batzordearen lehen saioa, bihar
Lehen saioa bihar izango da eta arratsaldeko 18:00etan emango zaio hasiera, Herri Eskolako areto nagusian. Saio honetan, Hirigintza Aholku Batzordearen inguruko informazio gehiago emango da, eta Udalak jakinarazi du «laster abiatuko den Plan Orokorraren berrikuspenaren inguruko informazioa ere emango dela».
Horretaz gain, Aholku Batzorde hau Plan Orokorraren berrikuspenaren prozesuan giltzarri izango da, eta herritar eta eragileen parte hartzea ezinbestekoa dela ere azaldu du Udalak.