Alokairu sozialeko 11 etxebizitza zozketatuko ditu Astigarragako Udalak: bost etxebizitza Kontxa Etxeberria plazako 7, 8 eta 9 atarietan; eta beste sei etxebizitza Urumea kaleko 6 eta 10 atarietan. Eta horretarako, dagoeneko zabalik dago epea, eskaerak aurkezteko: atzotik hasita, hilabeteko epea dago. 55 metro karratukoak dira etxebizitza txikienak, eta 82koak haundienak.
Bi logelakoak dira lau etxebizitza, eta hiru logelakoak beste zazpi etxebizitza. Guztiek daukate garajea eta trastelekua, eta sukaldea ekipatuta: hozkailua, labadora, ontzi-garbigailua, bitrozeramika, ke-kanpaia, arraska eta enzimera.
Zozketan parte hartu ahal izateko, hainbat baldintza bete beharko dituzte eskatzaileek. Hasteko, adin nagusikoak izan behar dute, eta Astigarragarekin loturaren bat eduki. Errolda bidezkoa izan daiteke lotura hori, batetik: duela bi urtetik herrian erroldatuta egon; edo orain erroldatuta ez egon arren, aurretik 10 urtez etenik gabe erroldatuta egon izana, edo 15 urtez txandaka. Eta bestetik, Astigarragan lan egitea izan daiteke lotura: azkeneko bost urteotan, gutxienez hiru urtez herrian lan egin izana. Baldintza ekonomikoei dagokienez, urteko errenta 3.000 eta 25.000 euro artekoa dutenek izango dute lehentasuna, baina 25.000 eurotik gorako errenta dutenen eskaerak ere onartuko dira, etxebizitzak adina eskatzaile ez badago. Gainera, eskaera aurkeztu dezakete gaur egun Astigarragan alokairu sozialeko kontratua dutenek ere, Aiotzategi 4koa tokatu zaienek izan ezik.
Zozketatuko diren 11 etxebizitzak, talde hauetan banatuko dira: bi logelako hiru etxebizitza, babes bereziko gizarte egoeran daudenentzat (70 urtetik gorakoak, desgaitasun psikikoa dutenak, guraso bakarreko bizikidetza unitateak, genero indarkeriaren biktimak, eta bananduta daudenak, ezkongabeak edota alargunak); hiru logelako hiru etxebizitza, familia ugarientzat; bi logelako eta hiru logelako etxebizitza bana, 35 urtetik beherakoentzat; eta orokorra, hiru logelako hiru etxebizitza, bi kide edo gehiagoko bizikidetza unitateentzat.
Hilero ordaindu beharreko errentari dagokionez, izango da kopuru finko bat, gehi eskatzailearen diru sarreren ehuneko bat: %13 eta %20 bitartekoa, urteko diru sarreren eta etxearen tamainaren arabera. Gutxienez, hilean 30 euro izango dira.