Pasa den aste honetan egitekoak ziren Astigarragako animalien Udal araudiaren berrikuspen prozesuari buruzko bilera irekia. Baina Astigarragako Udalak eta Aztikerrek, astebete atzeratzea erabaki zuten, «komunikazio aldetik guztia ondo prestatzeko eta deialdia ondo egiteko, eta saiorako beharrezko euskarri guztiak ondo prestatzeko» argudiatuz.
Beraz, Astigarragako animalien Udal araudiaren berrikuspen prozesuari buruzko bigarren bilera irekia datorren asteazkenean izango da, arratsaldeko 18:00etan hasita, Astigarragako Herri Eskolan.
Astigarragako Udalak txakurren araudiaren berrikuspena egiteko prozesu bat abiatu du, «udalerrian bizi diren animaliei eta bereziki txakurrei dagokionez herritarren artean dauden elkarbizitza ezaugarriak ezagutu nahi dira, eta berau hobetzeko gakoetan sakontzea izango da helburu nagusia» azaldu du.
Beharrezkoa, izena ematea
Asteazkeneko saioan parte hartzeko, beharrezkoa da aurrez izena ematea, bizi dugun osasun alarma dela eta. Izena emateko, alkatetza@astigarraga.eus helbidera idatzi daiteke, edo telefonoz, alkatetzara deituz 943 33 52 40. Aztikerrera ere deitu daiteke: 608 018 512.