Uztailean abiatu zen Astigarragako deskontu bonoen kanpaina, Covid-19ak eragindako kalte ekonomikoei aurreko egiteko asmoz. Emaitza onak izan dituenez, bigarren zatia egitea erabaki du Astigarragako Udalak, eta jadanik jarri da martxan. Martxoaren 31ra arte egongo da kanpaina, eta bonoak, urtarrilaren 31ra arte erosi daitezke.
Deskontu bonoen salmenta, online plataforma erabiliz egingo da, lehenengo kanpainan erabilitako berdina, hain zuzen. Bonoak izango dira 10, 20, 50 eta 100 eurokoak, eta herritar bakoitzak, gehienez ere, aukera izango du 400 eurora arteko bonoak erosteko.
Bi berrikuntza daude, bigarren kanpaina honetan. Lehena, bonoek izango duten deskontua %30ekoa izango dela; alegia, herritarrak ordaindutakoa baino diru kopuru haundiagoa (%30) izango du establezimenduan gastatzeko. Eta bigarrena, komertzio zein ostalari guztiek izango dutela parte hartzeko aukera, edizio honetan.
30.000 euro, kanpainarako
Astigarragako Udalak 30.000 euro bideratu ditu, deskontu bonoen kanpainaren bigarren zatia aurrera eramateko.
Bonoak erabiltzeko, zazpi dira eman beharreko pausoak. Lehenik, sartu guztion.astigarraga.eus/azoka helbidean. Ondoren, klikatu gustuko duzun establezimenduan. Bonoaren zenbatekoa aukeratu eta saskian sartu behar da jarraian. Kontua sortuta badaukagu, saioa hasi behar da; eta bestela, datuak bete kontua sortzeko. Ordainketa egin behar da ondoren, kreditu txartelaren bidez. Bonoak unean bertan deskargatu daitezke, eta posta elektronikoan jasoko dira. Azkenik, aukeratutako establezimendura joango gara bonoa inprimatuta, edo mugikorrean deskargatuta eraman.