Egun berezia izango da biharkoa astigartarrentzat; eta bereziki, herriko emakumeentzat. Izan ere, Emakumeon Plaza berritua inauguratuko dute eguerdiko 12:00etan, ekitaldi batekin.
Bertan, agurra eskainiko dute Astigar taldeko dantzariek eta Txirrisklako txistulariek, ekitaldiari hasiera emateko. Ondoren, plaza berritzeko prozesua nolakoa izan den azalduko du Aintzane Barandiaran Berdintasun zinegotziak; obren garapena erakusten duen bideoa jarriko dute ikusgai; eta muralaren diseinua azalduko du Nagore Legarreta argazkilari eta sortzaileak. Plazaren berrikuntzek badutelako zer azaldua eta zer kontatua, hain zuzen ere.
Duela bi urte jarri zuten martxan proiektua, eta azkeneko hilabeteotan «haizea alde izan ez dugun arren», eutsi diote proiektuak sortu duen «ilusioari», eta baita aurrera egin ere. Horren emaitza da, bihar herritarrek ikusi ahal izango dutena: «herriko emakumeen bilgune eta indarleku sinbolikoa osatu dugu, eta proiektuari errematea jarri diote Nagore Legarretak eta herriko 140 emakumek, mural indartsua eta berezia osatuz».
45 metroko murala, herriko emakumeen argazkiekin
2017an jarri zioten Emakumeon Plaza izena, eta hurrengo urtean, partaidetza prozesua abiatu zuten, plazaren eraberritze lanei buruz. Herritarren iritzi eta eskaerak bilduta idatzi zuten obra proiektua, eta bertan dagoen pareta batean, mural baten beharra ikusi zuten. «Eta noski, Emakumeon Plazako parte zela ikusita, irudiak emakumeekin lotutakoa behar zuen».
45 metro da luze pareta, eta 2,7 metroko altuera dauka. Eta oso-osorik, muralarekin estali dute orain: herriko 140 emakume horien argazkiekin osatu du Nagore Legarretak. Horretarako, argazki saio ugari antolatu zituen, eta horietan bildutako irudiekin egin du muralaren diseinua. Ondoren, beirazko panel haundietan serigrafiatu dute, murala bera.
Adin, joera, jatorri eta sentsibilitate ezberdinetako emakumeek hartu dute parte, eta beraien gorputz jarrerak dira protagonista, muralean. «Emakumeen indarrak dituen aldaera ezberdinak ikusarazi nahi izan dira diseinuan: emakumeen askatasuna, aukeratzeko gaitasuna, emakumeen indar intelektuala zein fisikoa, emakumeon erabakitzeko gaitasuna, ahalduntzea, mugak jartzeko gaitasuna, elkar babestekoa, irribarre edo dantza egitekoa...», nabarmendu dute.
Muralaren erdigunean, gainera, irudi deskriptiboetatik abstraktuagoetara egiten du: «irudiak eramaten gaitu emakume multzo baten artean murgiltzera. Kolore ezberdinetako beso multzo bat ikusten da elkar korapilatuta, eta irudiak bertako parte izatera eramaten zaitu. Beso horiek dira, Astigarragako eta mundu osoko emakume guztien sinbolo», azaldu dute.
Emakumeak, elkarren konplize
Azalpenen ondoren, musikari, abestiei, bertsoei eta dantzari egingo diete tokia. Inma Aramburoren biolin doinuei segika, dantza garaikidea eskainiko du Uxuri Irastorzak; Izarne Zelaiaren bertsoei, musika jarriko diete Aramburuk berak eta Aintzane Barandiaranek; eta Konplize ditut eta abestia kantatuko dute herriko zenbait emakumek. Eta tartean, hitza hartuko dute herriko talde feministetako kideek. Elkarren konplize direlako, eta horretarako gune aproposa izango dutelako aurrerantzean: inoiz baino gehiago, emakumeona izango den plaza.