Itxita dago Erribera kulturguneko liburutegia, eta ez dira bertan elkartuko haurrak, baina ipuin kontaketarik gabe ere ez dira geratuko, egun hauetan. Izan ere, internet bidezko saioak antolatu ditu Astigarragako liburutegiak, YouTuben daukan kanalaren bitartez.
Gaur izango da aurreneko saioa, Baby Klubari zuzendutakoa, Mestiza elkartearen eskutik. 0-3 urte bitarteko haurrentzako saio bat jarriko dute egunean zehar, YouTuben.
Bihar, berriz, Moko Txiki ipuina kontatuko du Lur Kortak. Arratsaldeko 17:00etan izango da, hori ere liburutegiaren YouTubeko kanalean. Leire Bilbaok idatzita eta Maite Mutuberriaren ilustrazioekin, moko txikia daukan txori txiki bat eta hipopotamo bat dira protagonista: hipopotamoaren bizkarrean bizi da txoria, eta bien garapena nabarituko du irakurleak.
Eta azkenik, internet bidez eskainiko dute Txiki Klubaren saioa ere, abenduaren 14an. 0-5 urtekoei zuzenduta, 12 haurrentzat izango da tokia, eta zuzeneko saioa egingo dute, Mestiza elkartearen eskutik. Horretarako, gonbidapenak eskatu behar ziren aldez aurretik, liburutegian bertan.