Abenduko kultur-agenda zabala antolatu dute Astigarragan eta, horrekin, bi emanaldi izango dira datorren asteburuan. Gazte Asanbladak eta Udalak elkarlanean antolatu dituzte, eta dagoeneko eskuragai daude sarrerak. Larunbatean Skabidean Iruñeko Ska taldearen kontzertua izango da Erribera kulturgunean, arratsaldeko 19:30ean. Sarrerak 5 euroan daude salgai eta, gehienez ere, pertsonako 3 erosi ahal izango dira. Horiek eskuratzeko hiru modu daude: asteartean, Gazte Asanbladak Joseba Barandiaran plazan jarriko duen postuan (17:00etatik 19:00etara bitartean, edo, sarrerak agortu arte); Erriberan bertan, ohiko ordutegian; edo, bestela, www.astigarraga.eus helbidean. Igandean, berriz, Barrexerka umorezko antzerkia izango da. Horretarako, sarrerak ere aldez aurretik aipatutako moduetan eskuratu daitezke, 2 euroren truke.
Bi emanaldiak, 6 euroan
Datorren asteburuko ikuskizunetarako sarrerak erosi daitezke banaka, edo, biak batera. Kontzerturako sarrerak 5 euroan daude salgai eta antzerkikoak, aldiz, 2 euroan. Hala ere, Udalak eta Gazte Asanbladak bi ikuskizunak 6 euroan ikusteko aukera eskaintzea erabaki dute. Beraz, biak ikusteko interesa dutenek, euro bateko deskontua jaso ahal izango dute, bi sarrerak batera erosiz gero.