Duela bi urte jarri zuen martxan Astigarragako Udalak proiektu hau. Eta abenduaren 13an izango da Astigarragako Emakumeon Plazako inaugurazioa, «herriko emakumeen bilgune eta indarleku sinbolikoa osatu dugu, eta proiektuaren ginda, Nagore Legarreta Argazkilari sortzaileak eta herriko 140 pertsonek eman diote, mural indartsua eta berezia osatuz».
Inaugurazioa, 13an
Emakumeon Plazako inauguraziorako, hainbat ekitaldi prestatu dituzte. Agurra dantzatuko du Astigar Dantza Taldeak. Ondoren, prozesua nolakoa izan den azalduko du Aintzane Barandiaran, Berdintasun Zinegotziak. Jarraian, making off bideoa ikusi ahal izango da, muralak erdian duen pantailan. Muralaren diseinuaren azalpena emango du Nagore Legarretak, eta ondoren, Uxuri Irastorzak dantza garaikidea dantzatuko du. Herriko talde feministako kideen hitzak ere eskainiko dira, eta jarraian bertso musikatuekin, girotuko da eguna. Amaitzeko Konplize ditut eta abestia kantatuko da.