Astigarragako Zipotza mendi taldea sortu berri da, eta etzi dute taldearen aurkezpena eta antolatutako lehen irteera. Egoera konplikatua den arren, ibilaldiarekin «aurrera egitea» erabaki dute. Herriko ibilbide bat egingo dute, PR-Gi 209 izenekoa: 12 kilometro eta lau ordu inguruko iraupena izango du.
Segurtasun neurri guztiak bermatuko dituzte txangoan eta horregatik, beharrezkoa izango da maskarilla jantzita eramatea. Horretaz gain, aldaketa txiki bat egon da plangintzan. Izan ere, ibilaldiaren amaieran hamaiketakoa egin ordez, pintxoak banatuko dira eskatutako edariarekin. «Bakoitzari berea banatuko zaio, segurtasun neurriak kontuan izanda. Horrela, bakoitzak bere edariarekin bere pintxoa izango du».
Zipotza mendi taldeak herritarrak animatu ditu, igandeko ibilaldian parte hartu dezaten. «Coronavirusak ez gaitzala gelditu, jarrai dezagun bizitzen elkar zainduz».