Dinamizatzaile talde batek Astigarragako erdigunea bisitatuko du ostegun honetan, indarrean dagoen osasun araudiaren azalpenak emateko. Gipuzkoan Gipuzkoako Ostalaritza Elkarteak jakinarazi duenez, bisitaren helburua da «herritarrak eta ostalaritza sektorea sentsibilizatzea, COVID-19ak eragindako pandemia eteteko hartu behar ditugun neurri-sanitarioak modu egokian betetzeko».
Kanpainaren abiapuntua da Eusko Jaurlaritzako Turismo eta Ostalaritza zuzendaritzak eta Euskadiko hiru lurraldeetako ostalaritza elkarteek urtero sinatutako elkarlanerako hitzarmena, eta Gipuzkoan Gipuzkoako Ostalaritza Elkarteak gidatuko du. Eta horrekin batera, Ostalaritza sektoretik erakundeetako ordezkariek pandemiaren aurka egiten ari diren lana azpimarratu nahi izan dute, eta egiten ari diren lana txalotu.
Erdigunea bisitatuko dute
Sentsibilizazio kanpaina honek lurraldeko hainbat herri bisitatu ditu. Hernanin, esaterako, uztailaren amaieran izan ziren; eta gomendioak ematen izan diren herri guztietan herriko erdigunea izan dute indargunea. Astigarragan ere, herriko erdigunea bisitatuko dute ostegunean, «jende pilaketa gehien jasotzen duen udalerriko gunea» delako. Arratsaldeko 19:00etatik 21:00etara bitartean izango da dinamizatzaile taldea bertan, osasun araudiaren azalpenak ematen.
Denbora tarte horretan herritarrak, ostalariak eta hauen bezeroak informatzea izango dute helburu, «indarrean dagoen osasun araudia behar bezala betetzeko». Batez ere maskarillaren erabileran, distantzia soziala bermatzeko irizpideetan, eskuetako garbitasunean, edota hamarreko muga ez gainditzeko neurrietan jarriko dute fokua. Eta bitarte horretan, herritarren artean maskarillak banatuko dituztela aurreratu dute.
Batez ere gazteei zuzenduta
Sentsibilizazio Kanpaina hau adin tarte guztietara zabaldu nahi bada ere, gazteengana iristeko «ahalegin berezia» egingo dela adierazi dute. Izan ere, beraien ustetan momentu honetan COVID-19aren zabalkundea geldiarazteko kolektibo hau da «sentsibilizazio eta pedagogia lan gehien» eskatzen duena.