Auzo-konposta hondakin organikoak kudeatzeko sistema jasangarriena dela adierazi du Astigarragako Udalak. «Izan ere, gure etxeetan sortzen ditugun hondakinak auzoan bertan kudeatzea ahalbidetzen du, eta ongarri bezala erabili dezakegun konposta lortzen dugu emaitza bezala».
Horregatik, herritarrak auzo-konpostan parte hartzera animatu ditu Udalak. Bereziki, auzo-konpostagailuetatik gertu bizi diren herritarrei zuzendu diete sistema honetan parte hartzeko deialdia. «Gure etxeko hondakin organikoak modu jasangarri batean auzoan bertan kudeatzeko sistema bat da auzo-konposta», azaldu dute.
Parte hartzen duen familia bakoitzak auzo-konposta gune bateko giltza dauka, eta bertara, etxean sortzen dituen hondakin organiko guztiak botatzen ditu: fruta eta barazkiak, haragi eta arraina, landare hondakinak etab. «Gainera, hondakinen tasan hobari bat aplikatzen zaie familia parte-hartzaileei», adierazi du Udalak.
Parte hartzeko bideak
Auzo-konpostan parte hartzeko interesa duenak ondoko bideetatik jarri daiteke harremanetan Udaletxearekin:, 900 102 838 telefono zenbakira deituta edo hondakinak@astigarraga.eus helbide elektronikora mezu bat idatzita.