Ergobiko festak ez dira ospatuko aurten, bailarako inguruko herri eta auzoetan gertatu den moduan. Izan ere, Koronabirusa dela eta bertan behera geratu dira festen programazioko ekitaldi eta emanaldiak. Hala ere, Ergobikoek egitarau berezia antolatu dute larunbat honetarako. Egun osoan zehar egiteko ezberdinak izango dira, adin guztietako auzotarrentzat.
Goizeko 11:00etan ipuin kontalariak hasiera emango dio Ergobiko kultur eguna 2020 egitarauari. Gero, Bakean dagona bakean utzi antzezlana izango da, 19:00etan. Mirari Arteaga eta Idoia Torregarai dira aktoreak, eta euskara, generoa umoregai hartuta, euskalkiak, onomatopeiak, amatasuna, gorpuztasuna eta kristalezko sabaia bezalako gaiak landuko dituzte emanaldian. Kritika eginez, deseraikiz eta barre eginez bazterrak zirikatzen dituzte, antzezlan honetan.
Eta egunari amaiera emateko, su festa izango da 22:30etan, Piroteknia Valecearen eskutik.
Segurtasun neurriak beteko dira emanaldi guztietan
Egunean zehar egingo diren hiru emanaldietan, bizi dugun pandemiak eskatzen dituen segurtasun eta osasun neurri guztiak beteko direla baieztatu dute antolatzaileek. «Oso garrantzitsua da tokian tokiko segurtasun neurri eta antolatzaileen gomendioak jarraitzea». Horretarako, maskarillen erabilera beharrezkoa dela gogorarazi dute. Gel desinfektatzailea ere eraman beharko da eta segurtasun distantziak mantendu beharko dira larunbateko emanaldi guztietan. Udalak eta Danak Bat Ergobiko kultur elkarteak antolatutako ekitaldiak dira larunbatean. Horregatik, jakinarazi dute egindako emanaldi guztiak aforo mugatua izango dutela. Horrela, segurtasun neurri guztiak bermatuko direla ziurtatu dute antolatzaileek.