Udako oporretan konpontze eta mantentze lan ugari egiteko aprobetxatzen dute herriko elkarte edo eskoletako eraikin askotan. Abuztua hilabete lasaia izaten da eta horregatik, Astigarragako Herri Eskolakoek instalakuntzetan zenbait moldaketa egitea erabaki dute.
Udalak 55.000 euro bideratu ditu mantentze eta hobekuntza lanak egiteko. Horrela, aurrekontu honekin asko dira egingo dituzten aldaketak. Informatikako ikasgela gela txikietan banatuko da (3 gela eta 2 biltegi), eta ordenagailuak liburutegian jarriko dira. Gainera, haur hezkuntzako bi geletan leihoen ordez ateak jarriko dira. Horrela, patio txikira irteera zuzena izango dute eskolako txikienek.
Bestalde, Herri Eskolako pasabideetan LED argiak jarriko dira eta azkenik, zenbait margoketa-lan egingo dira eskolako geletan, instalakuntzen itxura hobetzeko.
Higienea mantentzeko aldaketak egingo dituzte
Hobekuntza lan horiez gain, bestelako aldaketak ere egingo dituzte. Izan ere, Udalak jarritako aurrekontu honekin, komunetako kaniletan sentsoreak jarriko dira eskolan. Horrela, irakasle eta ikasleek ez dute eskuekin ikutzeko beharrik izango.