Hirugarren hitzordua izango du gaur, Sagardoak elkartzen gaitu ekimenak, Gipuzkoako Sagardogileen Elkartearen eta Bertsozale elkartearen eskutik. Oraingo honetan, bertso kata eta afari musikatua prestatu dituzte, Petritegi sagardotegian.
Arratsaldeko 20:30etan hasita, Aitor Mendiluze eta Iker Zubeldia ariko dira bertsotan, eta Imanol Kamiok gidatuko du afari musikatua. 40 euro dira, eta menua ere eman dute aditzera: txorizo egosia, bakailuz betetako piperrak, bakailua saltsan, txuleta parrillan, eta etxeko sagar tarta.
Beste bi hitzordu ere izango ditu Sagardoak elkartzen gaitu ekimenak, abuztuan; baina biak ere Urumea bailaratik kanpo. Abuztuaren 7an, musika jaialdia eta afaria izango dira Usurbilgo Saizar sagardotegian, 20:30etan. Eta abuztuaren 29an, bertso afaria antolatu dute Irungo Ola sagardotegian, 20:30etan hasita hori ere: Angel Peñagarikano, Sebastian Lizaso, Andoni Egaña eta Aitor Mendiluze ariko dira bertsotan.