Bukatu da aurtengo aurrekontu partehartzaileen prozesua, eta dagoeneko aukeratu dute herritarrek, zertara bideratu nahi duten 210.000 euroko partida: Andre Gobadarien ibai-parkearen gunea osatzeko izango da partida osoa.
Izan ere, proposamen horrek jaso ditu boto gehien, eta 210.000 eurokoa da bere aurrekontua, honakoak egiteko: pantalan bat, argiteria indartu, txakurrentzako espazio itxia, adinekoentzat ariketa fisikorako gunea, haurrentzat jolas gunea, gimnasio espazioa...
515 herritarrek eman dute botoa, aukeran zeuden 21 proposamenen artean; bakoitzak, horietatik lau aukeratu ahal izan ditu, gehienez. 315 astigartarrek hautatu dute ibai-parkea osatzeko proposamena, bere aukeren artean. Bigarren bozkatuena izan da hondakin organikoentzako poltsa konpostagarrien doako banaketa, herrian horretarako bi makina jarrita, 50.000 euroko aurrekontuarekin. 176 boto jaso ditu, baina aurreneko proposamenak 210.000 aurrekontu osoa hartu duenez, beste proposamenik ez da gauzatuko aurtengo partidarekin.
Beste hiru proposamen izan dira, 100 boto baino gehiagorekin: haur parkeen hobekuntza (210.000 euro), 145 botorekin; Bidebitarteren zati bat asfaltatzea (210.000 euro), 112 botorekin; eta herri baratza parke publiko berri bat egokitzea (130.000 euro), 112 botorekin hori ere.
Eta botoen araberako ordenean, honakoak izan dira hurrengoak: euskeraren erabilera sustatzeko programa (95 boto), irisgarritasuna hobetzeko lanak (95 boto), Santiomendiko aterpea eta inguruak berritzea (91 boto), genero berdintasuna sustatzeko ekintzak (85 boto), eta Arrobitxulon gune estali bat egokitzea (82 boto). Horiek osatu dituzte aurreneko hamarrak, baina proposamen guztiek jaso dituzte botoak; gutxienak, 22 boto.
Udalak eskerrak eman nahi izan dizkie, «prozesu honetan parte hartu duten astigartar guztiei, proposamenak aurkezteko fasean edota galdeketan».
Bozketan parte hartu duten 515 herritarren artean, gehiengoa dira 30-49 urte bitartekoak (345 herritar, %67a). Generoaren aldetik, emakumeek hartu dute parte gehiago (%56,5).